Antonio Campos Dias

Naran                                   : ANTONIO CAMPOS DIAS, ALIAS (CAMPOS) Oan husi Sr.Jaoa Bosco ho Sra.Carlota Campos.

Fatin Moris                      : ASSALAINO

Loron Moris                    : 16  DE SETEMBRO DE 1954

Nacionalidade               : TIMOR LESTE

Esposa                                 : JULIA DA COSTA

Tradisionalmente saudoso  Antonio Campos  kaben ho sra. Julia Da Costa iha 1987 no legalmente iha igreja Dom Bosco Fuiloro iha 2010. Nune saudoso husik nia esposa hamutuk ho oan nain 8 maka mane 6 ho feto 2.

1)        Antoninho Gui Campos

2)        Nicolau Ajito Campos

3)        Leonito Campos

4)        Dirce Campos

5)        Frendi Campos

6)        Joao Campos

7)        Marcelino Campos

8)        Celia Antunes Campos

Loron Mate       : 22 DE SETEMBRO DE 2016

                Fatin Ikus                             : JARDIM DOS HEROIS DA PATRIA METINARO

Careira:

1966: Saudoso hahu nia estudu kartilla iha eskola Saleziana Dom Bosco Fuiloro, no remata nia estudu iha 1971 (kuarta klase kompletu).

1973: Saudoso kontinua nia estudu iha siklu preparatorio lospalos to’o segundo ano no pasa ba terseiro ano. (terseiro ano la kompletu).

1974: Saudoso tuir kursu intensivu hodi sai nudar monitor Auxiliar iha posto administrtivu Luru (afabubu).

Iha 1996, saudoso akaba desimo Segundo ano iha eskola sekundaria Fereira Borges iha lisboa Portugal.

Iha 1997 to 2003 saudoso eskola iha Institutu Superior do Trabalho e de Empresa (ISCTE) Universidade Tecnica de Lisboa. Kurso jornalismo iha (cenjor) Centro Jornalismo iha Lisboa Portugal (1997/1998)

Depois de Revolusaun dos Gravos iha Portugal,  saudoso rekrutado nudar exersitu portugues iha unidade Polisia Militar (PM) nomos halo parte iha Movimento Forsas Armadas (MFA).

Iha 11 de agosto 1975 UDT halo golpe militar hasoru FRETILIN, saudazo adere an ba partido Fretilin no ikus mai hamutuk ho timor oan sira seluk halo parte iha FALINTIL no halo  kontra Golpe hasoru UDT iha 20 de Agusto 1975, no duni tuir UDT sira to’o iha fronteira nomos halo bareira hodi satan invazaun husi Indonesia hamutuk ho saudazo Cristiano Lima.

Iha prinsipio de fevereiro 1976 saudazo fas parte iha Kompanhia kuda fuik no destakado iha Laivai  no mos halo movimento siguransa iha areas ; Vaniria, Afabubu, no Laleno.

Depois muda fali ba iha Soro, no halo movimento  siguransa iha area Lospalos.Iha 1977, reestruturasaun das Forsas, Saudoso Antonio Campos nomeado nudar comandante pelotao ba kompania sakalo no  comandante operasional  saudoso Mario Sousa.

Saudazo hamutuk ho nia maluk sira tun mai iha vila no integra an  iha TONSUS nebe comanda husi saudoso Joao Silvestre Branco Ex.comandante sector iha Ponta Leste hodi halo rede clandestine.Como rede klandestina inimigo descobre, saudozo halai fila fali ba ailaran ho pistola ida iha 14 de Julho 1979.

Iha tinan ne’e duni (1979-1980)  saudoso nomeado nudar comandante pelotao destakamento norte regiaun Talisman, destakamento nebe saudoso Dinis Carvalho Nelo Kadomi Timor nudar premeiro comandante destakamento.

Iha 14 de maio 1981depois da Conferensia Nasional iha regiaun central,  Saudoso Antonio Campos halo parte segunda koluna hamutuk ho 247 elementos,kuadros superiores,kuadros medius, inferiores no combatentes, politico no militar, mobilizado ba iha regioes centrais.sira nebe halo parte koluna segunda, iha koluna ida ne  sei moris mak elementos nain 4: Teofilho (Lasudur) Home, Lamberto (Mau Malik) Sika lautem,Alcino malaka (Puno) Lautem inklui maun boot Kay Rala Xanana Gusmao.

To iha centro, regiaun militar central,Nakroman, saudoso assume kargo nudar komandante pelotao ba destakamento de ligasaun nasional, DESLIN

Liu tiha serku AITANA nebe hanaran Operasi Kikis Betis,saudoso fila fali ba Ponta Leste nudar comandante seguransa ba comandente em Chefe Kay Rala Xanana Gusmao.

Iha fulan fevereiro 1983 fila fali ba centro ho Comandante Kay Rala Xanana Gusmao, iha marso 1983 hahu para tiru malu sessar fogu, saudoso halo parte seguransa ba hasoru Koronel Purwanto iha Buburake area Liaruka Ossu ho Ex.Governador Mario Viega Carrascalao iha Lariguto area builale Ossu.

Iha abril 1984, depois de reestruturasaun nebe hanaran restruturasaun radikal, saudoso nudar colaborador estado maior das Falintil.

1985,Saudoso Antonio Campos,nudar  coordenador COMDOP (commando das operasoens). Nudar responsavel komunikasaun radio emisor- receptor entre SIET,organijasaun solidariedade iha Australia ho Resistensia Armada iha  regiaun central.

1986,saudoso  hamutuk ho sub Chefe estado Maior actual Presidente Taur Matan Ruak komanda forsa halo operasaun iha regiaun Ponta Leste,iha loron  13 de fevereiro 1986 tiru malu ho forsas Indonesia Timsera-Timsaka iha fatin legumau area bagia hahu husi 12hrs meudia to’o 17hrs lokraik saudoso hetan kanek iha nia ain,lao ladiak no subar iha fatin ne’e duni ho nia eskolto Gilberto.Iha loron tuir mai dia 14 militar indonesia halo operasaun rusga kaptura saudoso Antonio Campos tula iha helikoptro lori  ba forsa Indonesia nia komando opresaun iha fatin ida naran  Dirimuni, la keleur saudoso ninia eskolto Gilberto mos militar Indonesia kaptura ho kanek todan,depois Dirimuni lori ba Flanboyan hodi halo inkerito. Iha ne lori ba iha Hospital Gatot Soeprato iha Jakarta durante fulan 6 hodi halo tratamento ba nia kanek,inkerito no fase kakutak.

Iha agosto 1986  fila fali mai Timor ba hela iha nia moris fatin obriga nia hodi komanda Tim Alfa.

Iha outobro/novembro 1986 saudoso reestabelese ligasaun ho Frente Armada regiaun Ponta leste.

Iha novembro 1992 depois de kaptura Komandante Em Chefe Kay Rala Xanana Gusmao inimigo deskobre saudoso ninia serviso kaer saudoso ho membro frente clandestina hamutuk 37 mesak assalaino ninia oan sira no kastigo iha Mes Gula lospalos vila durante loron 23 foin liberta sira, maibe halo nafatin wajib lapor(aprejenta an lor-loron)  ho turtura pisikolojika ho fijika to’o 1996 iha pos komando trisula.

Iha 1996 saudoso ba tuir reuniaun iha ailaran durante loron 2 iha fatin ida naran Sakara’u/Sakalo lospalos nebe adjunto Larimau ho Comandante Aluk hodi konvense nia  atu husu AZILU Politico ba rai liur (Portugal) ho jovens balun.

Iha dia 1 de abril saudoso husik nia fen no oan nain 5 iha lospalos/assalaino ba dili,iha dia 4 de abril sai husi porto Dili ho ro Indonesia ho naran Dobon Solo ba Bali depois ba Jakarta. saudoso ho nia maluk nain 7 sai husi Jakarta iha dia 24 de abril to’o iha airoporto Portela de Lisboa iha 25 de abril de 1996.

Iha dia 14 de abril de 1996 saudoso ho nia maluk nain 7 mak tuir mai ne’e:

1.Filomeno mota.

2.Felix da conceicao

3.Boaventura Xavier

4.Oldegario Xavier

5.Dino Gandara

6.Florindo Dos santos

7.Levogildo Rosa

haksoit tama iha Embaisada Alemanha (German), maibe saudoso ho nia maluk nain 7 ne’e la ses husi violensia brutal husi militar Indonesia iha embaisada nia laran. Militar Indonesio baku tohar saudoso nia ain nebe uluk hetan tiru hodi  kaer iha legumau.Saudoso ho ninia maluk sira konsege sai duni ba Portugal iha dia 14 de abril de 1996. Ba iha Portugal saudoso hetan tratamento iha Ospital Sao Jose iha Lisboa.

Iha duni tinan 1996 bainhira saudoso sai husi Ospital Sao Jose acompanha Dr.Jose Horta partisipa reuniaun Direitos Humanos iha Genebra, halo intervensaun durante 10 minutus kona ba violasaun direitos humanos husi militar indonesio sira iha Timor Leste.

Iha 1997 saudoso partisipa iha conferensia Juventude CPLP, Timor Leste nudar obvervadores especial saudoso hato’o situasaun iha timor leste ba president sao tome e principe dr.Miguel Trovoada. Iha oportunidade ne, saudoso to cabo verde hato mos situasaun Timor leste ba Primeiro Ministro Cabo Verde nian kona ba luta Povo Maubere nian.

Iha tinan nee duni, saudoso ba to’o Sahara Ocidental partisipa iha Conferensia Internasional Estudante husi nasaun 68, hodi hato’o funu iha Timor leste no hasoru malu ho President. Sara ui Muhamad.

Iha 1997/1998,saudoso nudar Responsavel halo sensibilijasaun politika kona ba funu iha timor leste iha espanha hanesan:

Galicia, Sao Tiago de Compostela,Lugu,Vigo, ho curunha to referendum. Saudoso bainhira too iha Portugal iha 1996 halo parte Sekeretariado Renetil iha Lisboa no co fundador assosiasaun 12 de novembro. Saudoso nudar figura destakada entre jovens sira nebe husu azilu politico ba rai liur/Portugal.

Resumo:

Saudoso Antonio Campos nudar guerileiro hnesan nia maluk sira seluk nebe ohin loron ita hanaran veteranu maibe nia marka ninia diferensia tamba veteranu kombatente libertasaun ida nebe fo ninia kontribuisaun ativo no efetivo iha frente tolu hanesan tuir mai:

1: Frente Armanda.

2: Frente Clandestina, no

3: Frente diplomatika.

Dedikasaun ikus husi saudaso Antonio Campos iha tempu ukun an mak hanesan tuir mai;

Iha 2003, Saudoso nudur mestre iha colegio Dom Bosco Fuiloro.

Iha 2004/2005, Saudoso nudar sefi gabinete iha ministerio solidariedade sosial.

Iha 2008, Saudoso nudar mestre iha ensino sekundaria  Nino Konis Santana lospalos, nudar mestre to saudoso nia is ikus iha loron (22 de setembro de 2016).

Testo biografia resumo husi livro nebe saudoso hakerek rasik ho titulu ‘’ MEMORIA HUSI UM GUERRILHEIRO’’

‘’ADEUS PAI, ITA NIA MEMORIA SEI MEMORIA AMI OAN SIRA NO MEMORIA BA FUNU RAI TIMOR LESTE NIA UKUN RASIK AN’’

Elabordo husi saudoso nia oan mane bo’ot Antoninho Gui Campos.

Asinado pelo

(ANTONINHO GUI CAMPOS)

Share this: